Despezan no peirao de Oza unha gran balea que apareceu morta na costa da Coruña
O cetáceo duns 21 metros e unhas 30 toneladas é o maior que apareceu nas costas galegas nos últimos anos
Desde primeira hora da mañá, antes incluso de que se fixese día, un amplo dispositivo despregouse no peirao de Oza, na Coruña, para tratar de levar de alí a balea que este sábado aparecía morta fronte á zona do Portiño.
Máis dunha ducia de persoas e dous guindastres comezaron eses traballos e o primeiro que tocou facer foi lograr varar completamente nun lugar seguro este grande animal. Posteriormente iniciaron o despezado para máis tarde intentar levalo para o seu estudo e análise posterior, e a incineración dos restos.
A balea calcúlase que pesa unhas 30 toneladas e mide uns 21 metros de lonxitude. Segundo explicaba Uxía Vázquez, oceanógrafa da Coordinadora para o Estudo de Mamíferos Mariños (CEMMA), o animal é o máis grande que varou nas costas galegas nos últimos anos: "Apareceron baleas máis pequenas, pero a diferenza duns poucos metros supón unha diferenza grande de volume e peso".
En canto aos traballos, explicaba que o despezamento previo é necesario, xa que non é manexable para guindastres e camións: "Non poden, e non queda outra que despezala", explicou.
