Ata 32 proxectos de cooperación no exterior recibirán 6 millóns de euros da Xunta de Galicia

Ata 32 proxectos de cooperación para o desenvolvemento no exterior recibirán preto de 6 millóns de euros da Xunta, en total, para levalos adiante.

A administración autonómica fixo pública a resolución da convocatoria destas axudas que se distribúen entre 2025 e 2026.

Do total de propostas, tres son en agrupación de dúas entidades, 23 corresponden a proxectos de Organizacións Non Gobernamentais para o Desenvolvemento (ONGD) cun financiamento total de 4,15 millóns de euros e dous, a outros axentes de cooperación, con case 370.000 euros.

Ademais, no marco da nova liña de axudas creada este ano en apoio a organizacións feministas e de defensa dos dereitos das mulleres, financiaranse 7 proxectos cun total de 1,2 millóns de euros.

Case todos os proxectos executaranse nos países prioritarios para a Cooperación Galega. En concreto, sete iniciativas desenvolveranse en Guatemala, seis en Perú, catro en Bolivia, tres en Mozambique, tres en República Dominicana, tres en Nicaragua, dous no Salvador, dous en Honduras e unha en Guinea Bissau.

Axudas para entidades de acción voluntaria

A Xunta tamén publicou a resolución da convocatoria anual de subvencións dirixidas a preto dun centenar de entidades de acción voluntaria de carácter privado para o fomento e realización de actividades de voluntariado no territorio galego.

Esta nova edición do programa de axudas da Consellería de Cultura, Lingua e Xuventude conta cun orzamento de máis de 130.000 euros e está destinada a apoiar accións que contribúan a construír unha sociedade máis solidaria e participativa.

As entidades incluídas nesta convocatoria son 42 da provincia da Coruña, 17 da de Lugo, 9 de Ourense e 30 da de Pontevedra.