Os usuarios de Renfe sofren problemas este martes para adquirir billetes en Galicia

 Os usuarios de Renfe sufriron este martes problemas á hora de adquirir os billetes para os trens do eixe atlántico, entre Vigo e A Coruña.

A compañía confirmou que experimentaron problemas técnicos para que os viaxeiros puidesen reservar os seus asentos a través de dispositivos móbiles e ordenadores.

A aplicación indicaba que todos os trens do día entre Vigo e A Coruña, desde ambas localidades, ían completos, mentres que por ordenador a venda tamén daba erro.

Problemas dos que non se libraron as oficinas de Renfe nas estacións, onde aos usuarios se lles indicaba que só podían despachar billetes cuns 20 minutos de antelación respecto á hora de saída dos trens.

Renfe traballa en dar solución a eses contratempos que coinciden coa reorganización dos servizos asociados á liña do Miño (Ourense-Vigo) e o reaxuste do itinerario do Alvia Galicia-Cataluña, que fixa a súa orixe e destino na estación viguesa de Urzaiz, circulará por Santiago de Compostela e terá novas paradas en Vilagarcía de Arousa e Pontevedra.

Mentres, os viaxeiros da Coruña terán que conectar con Cataluña mediante unha ligazón na estación de Santiago de Compostela. Ata agora, o tren Galicia-Cataluña circulaba en días alternos desde Vigo e A Coruña no seu percorrido pola comunidade autónoma.

Esas modificacións coinciden cos traballos que se están realizando na nova estación da Coruña, así como os que se executan entre Redondela e Guillarei, ao sur da provincia de Pontevedra.

A reorganización do servizo implica pequenos axustes nos actuais trens de ligazón.

Así, o Avant nocturno Ourense-A Coruña continúa prestando servizo os domingos, mentres que o servizo Avant matinal amplía a súa circulación de luns a venres e adianta a súa saída ás 7:45 horas para facilitar tanto a ligazón co Alvia de Barcelona como os desprazamentos de traballadores e estudantes.

A reorganización de Renfe complétase coa circulación dunha segunda frecuencia diaria entre Vigo Guixar e Ponferrada en cada sentido.

O servizo garante as paradas en O Porriño, Guillarei e Redondela, onde o Alvia Galicia-Cataluña deixa de parar desde este luns e por obras que afectan de forma temporal ao ‘Tren Celta’ -que conecta con Portugal-.

Pola súa parte, o traxecto entre Guillarei e Vigo-Guixar realízase por estrada.