Ascenden a oito os focos de gripe aviaria en aves silvestres en Galicia
Os dous últimos casos detectáronse en Ordes e Ribeira
A Consellería do Medio Rural comunicoulle ao Ministerio de Agricultura, a través da Rede de Alerta Sanitaria Veterinaria, a detección de dous exemplares de ave silvestre afectados por influencia aviaria de alta patoxenicidade.
A Xunta, nunha nota, detallou que se trata de dúas gaivotas patiamarelas atopadas en Ordes e Ribeira, e que foron trasladadas ao Centro de Recuperación de Fauna Silvestre de Oleiros.
Con estes dous focos son oito en total os confirmados en aves silvestres en Galicia no 2025. A Xunta destaca que actualmente non hai medidas especiais de restrición na comunidade, excepto as de prevención sanitaria aplicables aos concellos que pertencen ás denominadas Zonas de Especial Risco (Cambados, O Grove, A Illa de Arousa, Meaño, Ribadumia, Sanxenxo e Vilanova de Arousa na provincia de Pontevedra; Cerceda, Ordes e Tordoia na provincia da Coruña; e Xove na de Lugo), medidas relacionadas fundamentalmente coas condicións de cría de aves ao aire libre e á celebración de concentracións de aves.
Dependendo da evolución da situación epidemiolóxica, revisada semanalmente en base a indicadores de risco epidemiolóxicos, estas medidas poderían modificarse e/ou estenderse a outras zonas.
