Asasinada unha muller tras ser agredida con arma branca por un home en Torrijos (Toledo)
No domicilio da rúa Cirio Montero, no que se produciu o suceso ás 13:10 horas, había dous menores
De confirmarse este caso e o rexistrado onte pola tarde en Alacant como asasinatos machistas, serían 43 mulleres as vítimas mortais da violencia de xénero no que vai de ano, 1.338 desde 2003
O teléfono 016, o correo electrónico 016-online@igualdad.gob.es e a canle do WhatsApp no número 600 000 016 son recursos activos todos os días da semana e as 24 horas do día para pedir axuda; ademais do 112, o 091 ou o 062 e a app ALERTCOPS
Axentes da Garda Civil xunto a vivenda onde a muller foi asasinada en Torrijos (Toledo), rúa Cirio Montero (EFE)
Unha muller de 39 anos foi asasinada este mércores en Torrijos (Toledo) tras sufrir unha agresión con arma branca por parte dun home de 45 anos, que foi trasladado nunha UVI móbil ao Hospital Universitario de Toledo por diversas lesións e que xa foi detido, sendo a Garda Civil a encargada da investigación.
A Delegación do Goberno contra a Violencia de Xénero indicou a través de redes sociais que está a solicitar datos deste asasinato, xa que se podería tratar dun presunto caso de violencia machista.
Ademais, o ministro do Interior, Fernando Grande-Marlaska, durante a inauguración do novo cuartel da Garda Civil en Caudete (Albacete), tamén apuntou a que este asasinato podería ser un novo caso de violencia de xénero.
Fontes da investigación indicaron a EFE que no domicilio no que se produciu o suceso había dous menores, que están a ser atendidos polo psicólogo do Centro da Muller e tamén se están desprazando un equipo de traballadores sociais do Concello de Torrijos.
O servizo de emerxencias 112 de Castela-A Mancha informou a EFE de que o suceso ocorreu ás 13:10 horas deste mércores nunha vivenda da rúa Cirio Montero, cando a muller recibiu varias feridas de arma branca no abdome, que lle causaron a morte.
Nin a vítima nin o agresor estaban rexistrados no Sistema Viogén.
De confirmarse este caso e o rexistrado onte pola tarde en Alacante como asasinatos machistas, serían 43 mulleres as vítimas mortais da violencia de xénero no que vai de ano, 1.338 desde 2003.
Segundo a Macroenquisa de Violencia contra a Muller presentada este mécores 3 de decembro unha de cada tres mulleres sufriu violencia machista nalgún momento. O que significa que o 30 % das mulleres experimentou polo menos un tipo de violencia — física, sexual, económica e psicolóxica — por parte da súa parella ou exparella.
As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.
Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.
