As oposicións de educación celebraranse a partir do 21 de xuño en 16 localidades galegas

As oposicións de educación deste ano desenvolveranse a partir do 21 de xuño en 16 localidades de toda Galicia. Así o adiantou este sábado o conselleiro de Educación, Ciencia, Universidades e FP, Román Rodríguez.

Nun acto celebrado en Santiago, o titular de Educación explicou que serán 20.520 as persoas que participen nestas probas, optando a un total de 1.664 prazas.

"Isto supón mobilizar 915 persoas, que conforman os 183 tribunais que xulgan e supervisan os exames, un total de 2.562 persoas se temos en conta tamén os membros dos tribunais suplentes", engadiu.

Os exames desenvolveranse en 16 localidades das catro provincias galegas, en concreto na Coruña, Ames, Betanzos, Culleredo, Ferrol, Oleiros, Santiago de Compostela, Lugo, Rábade, Ourense, Pontevedra, Lalín, Poio, Ponteareas, Vigo e Vilagarcía de Arousa.

Tipo de prazas

Segundo debullou, a maior parte das prazas, un total de 1.424, son de ingreso libre, mentres que 10 son para o acceso ao corpo de inspectores de educación e outras 230 para que mestres que forman parte xa do sistema poidan acceder a un posto como profesores de Secundaria.

Por corpos, no de mestres hai 426 prazas en oito especialidades, e no de profesores de Secundaria 918 en 33 especialidades. Por outra banda, hai 80 prazas en oito especialidades no corpo de profesores especialistas en sectores singulares da FP e 10 para inspectores de educación. En canto á promoción interna, hai 230 prazas en 32 especialidades.

Con todo, o conselleiro sinalou que este ano se ofertan un total de 1.664 prazas, "o máximo do 120 % da taxa de reposición permitido pola lei, é dicir, cóbrense 120 postos por cada 100 baixas".

Os tribunais

Segundo indicou Rodríguez, o maior número de tribunais estará nas probas das especialidades de profesores de Secundaria, un total de 93; mentres que para mestres haberá 77 tribunais, para profesores especialistas en sectores singulares de FP haberá 10, para a acreditación do coñecemento de galego, dous tribunais e para inspectores de educación, un tribunal.

Por provincias, haberá 81 na da Coruña, 18 na de Lugo, 19 na de Ourense e 65 na de Pontevedra. Neste sentido, indicou que a provincia con máis opositores é a da Coruña, con 9.147 opositores, seguida da de Pontevedra, con 7.277 e, por último, en Lugo están rexistrados 1.953 opositores, mentres que en Ourense serán 2.143.