Máis de 2.000 aspirantes ás oposicións ao ensino en Galicia pasan á segunda fase
Inscribíranse no proceso máis de 20.500 persoas e presentáronse 17.600
Saíron 1.664 prazas a concurso
Das máis de 20.500 persoas que se inscribiron para opositar ao ensino en Galicia este verán presentáronse ás probas 17.600. Culminada a primeira parte do proceso, o conselleiro de Educación anunciou que pasaron á última fase, a de programación, 2.123 aspirantes.
Recordamos que hai 1.664 prazas a concurso.
"Estamos xa nuns números moi axustados que van posibilitar que o 20 de xullo teñamos xa rematado este proceso", puntualizou Román Rodríguez.
O conselleiro subliñou que o desenvolvemento das oposicións é complexo desde o punto de vista loxístico, pero que todo está discorrendo con normalidade.
"Estamos a falar de 183 tribunais, que mobilizan 2.500 profesores e profesoras que forman parte dos mesmos", explicou.
Román Rodríguez fixo estas declaracións antes de participar na conmemoración do centenario da chegada a Galicia do refractor Steinheil, no Observatorio Astronómico de Santiago.
