As forzas soberanistas ameazan con tombar a reforma laboral no Congreso se non se cambia o texto
ERC, Bildu, o BNG e a CUP asinan unha declaración conxunta en que piden que a norma se tramite como proxecto de lei para poder introducir emendas
As catro forzas soberanistas, que suman 21 escanos no Congreso, fan fronte común contra a reforma laboral pactada cos axentes sociais.
Nunha declaración conxunta pídenlle ao Goberno que a tramite como proxecto de lei para poder introducir cambios no texto. En caso contrario ameazan con tombala na votación da semana que vén.
Néstor Rego, deputado do BNG, explica: "No Bloque Nacionalista Galego temos claro que derrogar a reforma laboral do PP é incluír os elementos centrais que están nesta declaración conxunta".
Só Esquerra Republicana deixa a porta aberta. De momento continúan negociando con Yolanda Díaz.
A vicepresidenta segunda do Goberno advírteos: "Non sei se saben en Cataluña que nunca me levanto dunha mesa, é dicir, que vou esgotar a negociación. É moi difícil dicirlle que non a algo que é bo para a xente".
Pedro Sánchez desoe o ultimato dos seus socios de investidura e insiste: "Pídolle ao Poder Lexislativo, aos grupos parlamentarios, que validen unha reforma laboral que é boa".
Polo momento o Goberno ten o apoio provisional de Ciudadanos. O do PP parece descartado.
"Parece que o Goberno ten problemas para aprobar a reforma laboral. Como non nos chamaron, mantémonos na nosa posición", di Pablo Casado, presidente dos populares.
Ao Goberno quédalle unha semana para conseguir os apoios. O decreto votarase o xoves que vén no Congreso.
Os axentes sociais apelan á responsabilidade das forzas políticas para que validen a reforma
Tanto a patronal coma os sindicatos consideran que a reforma laboral que conseguiron tras nove meses de negociación é boa para España. E din que lle dará estabilidade ao país. Pero aseguran que agora a responsabilidade está en mans dos partidos políticos.
Antonio Garamendi, presidente da CEOE, di: "Alá eles coa súa responsabilidade. Nós estivemos nove meses traballando e pensamos que aprobar a reforma laboral é moi bo para España. Pero agora xa está na man dos políticos esa responsabilidade".
Pepe Álvarez, secretario xeral de UXT: "Estamos ante unha reforma histórica. Por primeira vez desde a aprobación do Estatuto dos Traballadores hai unha reforma que mellora as condicións laborais do país".
