Sánchez propón un plan estatal de loita contra a corrupción: "Pensei dimitir, pero tirar a toalla non é unha opción"

O presidente do Goberno Pedro Sánchez comparece ante o Pleno do Congreso nunha sesión extraordinaria para dar explicacións tras as últimas revelacións sobre a corrupción que supostamente afecta aos dous exsecretarios xerais do PSOE, Santos Cerdán e José Luis Ábalos, que eran da súa máxima confianza.

Ao comezar a súa intervención, Sánchez defendeu ser un político limpo e liderar un partido exemplar, e dixo: "Veño render contas e asumir responsabilidades". O presidente do Goberno dixo ter unha sensación de decepción consigo mesmo e con aqueles en quen nunca debeu confiar.

Admite que pensou dimitir

A continuación admitiu que considerou no seu momento dimitir e convocar eleccións, porque parecía a solución máis sinxela para el e a súa familia, pero que tras reflexionar decidiu non tirar a toalla e seguir adiante.

Plan estatal contra a corrupción

Sánchez anunciou un plan estatal de loita contra a corrupción, elaborado xunto á Organización para a Cooperación e o Desenvolvemento Económico (OCDE), e do que formarán parte quince medidas, entre elas a creación dunha axencia de integridade pública independente.

Este plan preparouse durante o último mes e, ademais de estar traballado coa OCDE, incorpora algunhas das propostas que foron expondo diversos grupos parlamentarios, como a relativa á axencia de integridade pública exposta por Sumar.

Segundo explicou, o obxectivo é situar a España á vangarda da loita contra a corrupción.

As medidas articúlanse en cinco grandes eixos e están concretadas nun documento de 33 páxinas ao que Goberno dará difusión na páxina web oficial da Moncloa:

Prevención de riscos e fortalecemento dos controis fronte á corrupción

Neste ámbito Sanchez propuxo a posta en marcha dunha Axencia de Integridade Pública que asumirá as funcións clave para a prevención, supervisión e persecución de prácticas corruptas aglutinando e coordinando as competencias de varios organismos estatais que se ocupan desta misión.

As medidas inclúen a extensión da metodoloxía aplicada á adxudicación dos Fondos Next Generation a toda a Administración, a introdución de aplicacións de Intelixencia Artificial (IA) na plataforma de contratación do sector público, esixencia de sistemas para garantir o cumprimento das medidas contra a corrupción por parte das empresas que queiran contratar coas administracións, e despregamento de pactos de integridade para determinados contratos públicos.

Ademais proponse unha nova Lei de Administración Aberta que reforzará a obrigación de transparencia activa, con mecanismos de alerta temperá, así como actualización do Portal de Transparencia e controis patrimoniais aleatorios e anuais para altos cargos durante todo o seu mandato.

Ademais impulsarase o reforzamento dos controis sobre os partidos políticos, que inclúe obrigar a estas formacións e as súas fundacións con financiamento público superior a 50.000 euros a someterse a auditorías externas e independentes. Tamén, baixar o limiar de publicidade de doazóns a 2.500 euros e como máximo nun mes da súa recepción. E aprobación da Lei de Grupos de Interese, xa en trámite parlamentario.

Protección aos denunciantes de corrupción

Neste punto preténdese incluír na Lei de Axuizamento Criminal medidas para garantir a confidencialidade, protección e apoio legal ás persoas que acudan ás autoridades para denunciar actos de corrupción. E esixir ás empresas canles internos de denuncia e ás administracións a súa integración nun sistema de integridade institucional.

Reforzo da capacidade do Estado para investigar, xulgar e sancionar a corrupción

O terceiro punto da proposta apunta a creación de seccións especializadas en delitos contra a Administración Pública dentro dos novos tribunais de instancia, con xuíces especializados, para axilizar os procesos xudiciais e aumentar a súa eficacia. Igualmente, outorgar carácter preferente cun procedemento sumario ás causas con cargos públicos implicados.

Nesa liña quere reforzarse a Fiscalía Anticorrupción con máis medios e remisión ao Parlamento da nova Lei de Axuizamento Criminal cunha reforma estrutural do modelo de instrución penal, para que sexa a Fiscalía a que exerza esta competencia.

Ademais endureceranse as penas por delitos contra a Administración Pública, duplicación dos prazos de prescrición e aumento das multas a empresas corruptoras e crear un sistema de exclusión e "listas negras" para que non poidan seguir contratando coa Administración. e endurecer as sancións aos partidos por infraccións contables e retirada de subvencións a quen manteña nas súas listas e estrutura a condenados por corrupción.

Recuperación dos bens roubados mediante a corrupción

O cuarto punto pretende aumentar os medios e persoal da Oficina de Recuperación e Xestión de Activos, encargada de localizar e administrar os bens obtidos ilicitamente, optimizando a súa coordinación con xulgados, fiscalías e tamén Fiscalía Europea.

Ademais introdúcese a figura do comiso administrativo ou preventivo, que permitirá incautar bens vinculados a actividades delituosas, sen necesidade de condena penal, evitando que os responsables oculten ou dispoñan do diñeiro roubado antes de que chegue a xustiza.

Xeración dunha verdadeira cultura de integridade

E por último, no quinto punto proponse a realización de estudos demoscópicos anuais sobre a percepción e experiencia directa da corrupción en España, a cargo do Centro de Investigacións Sociolóxicas (CIS), xunto ao lanzamento de campañas de concienciación cidadá e reforzo da formación dos empregados públicos en integridade e prevención.