As festas de Vigo, en risco por falta de autorización para as atraccións

Non está claro que as festas de Vigo se repitan tal e como as coñecemos. Polo momento non conta ningunha atracción con autorización para instalarse. Os traballadores do sector acusan o Concello de trabas excesivas.

Insisten en que lles piden documentación que outros municipios non reclaman. Por exemplo, hai só un par de semanas Leonor dos Anjos instalaba o Saltamontes en Santiago para as Festas da Ascensión e di que en Vigo xa llo "denegaron". Sabe do que fala. O ano pasado faleceu un home nunha atracción semellante á súa, de aí tamén que se fagan máis estritos os controis.

O sector traballa coa Xunta e co Colexio de Enxeñeiros para redactar un manual que se aplique en todos os municipios. Dende o Concello de Vigo defenden que só esixen o que recolle a lei autonómica, que hai que cumprila si ou si.