As familias das vítimas do Villa de Pitanxo reclaman "toda a verdade" un ano despois
O 15 de febreiro fará un ano do naufraxio en que morreron 21 mariñeiros en augas de Terra Nova
As familias acusan a empresa armadora de ocultar a verdade desde o primeiro momento da traxedia
O Goberno comezou a licitación para os traballos de localización e inspección do barco.
O 15 de febreiro fará un ano do naufraxio do Villa de Pitanxo, no que perderon a vida 21 mariñeiros. As súas familias reviven a traxedia cunha mestura de dor e indignación polo trato que, segundo din, recibiron por parte da empresa armadora.
Só tres dos 24 tripulantes conseguiron sobrevivir: o patrón do buque, o seu sobriño e un mariñeiro de orixe ghanesa. Este último desmentiu que o barco fora a pique por unha parada do motor, tal como declarara o patrón, que está sendo investigado na Audiencia Nacional por supostos delitos de homicidio por imprudencia e contra a saúde dos traballadores. As familias seguen esixindo respostas.
O Goberno comezou a licitación dos traballos para baixar ata a zona onde afundiu o barco, a 250 millas de Terra Nova, para atopar probas sobre os motivos do accidente.
As familias din que é un primeiro paso para saber a verdade pero que non van parar na súa loita ata que se faga xustiza. O próximo venres 17 vaise celebrar en Marín unha homenaxe aos 21 falecidos, coa colocación dunha placa na súa lembranza, nun acto en que van participar todas as familias.
