Rescatan dous pescadores tras o incendio do seu barco en Muros
Ambos quedaron feridos e tiveron que ser trasladados ao Hospital do Barbanza, un deles con queimaduras na cara
Outra embarcación auxiliou os mariñeiros ata a chegada dos servizos de Salvamento Marítimo
Gardacostas realizou os labores de extinción, pero non puido evitar o afundimento da embarcación
Nuevo Mariño (Salvamento Marítimo)
Dous pescadores foron rescatados tras declararse un incendio no barco en que pescaban. Ambos tiveron que ser trasladados ao Hospital do Barbanza, un deles con queimaduras na cara.
O 112 Galicia tivo constancia deste suceso ás 06:15 horas a través do persoal de Urxencias Sanitarias de Galicia-061. Enviaron unha ambulancia ao porto pesqueiro de Porto do Son para recoller estes dous mariñeiros, que sufriron un incendio no barco Nuevo Mariño cando pescaban a máis de tres millas da costa de Louro.
O pesqueiro La Chainza, que traballaba na zona, puido rescatar as dúas persoas, que foron recollidas pola Salvamar Regulus, de Salvamento Marítimo. Esta embarcación de rescate levou os feridos ata o porto de Porto do Son, desde onde os trasladaron en ambulancia ao Hospital do Barbanza. Un deles presenta queimaduras na cara.
No operativo participaron Urxencias Sanitarias de Galicia-061, Salvamento Marítimo, o Servizo de Gardacostas de Galicia e os axentes da Garda Civil.
O Buque Mar de Galicia do Servizo de Gardacostas realizou os labores de extinción no Nuevo Mariño e finalmente informou do afundimento da embarcación.
