Arrinca o xuízo á cúpula de Interior co Goberno de Rajoy polo caso Kitchen
A Fiscalía pide quince anos de cadea para o exministro Fernández Díaz por ordenar espiar o extesorero do PP, Luis Bárcenas para tentar boicotear a investigación do caso Gürtel
Na Audiencia Nacional comparecerán como testemuñas Rajoy, Sáenz de Santamaría, Cospedal, e o senador do PP Javier Arenas
Comeza este luns na Audiencia Nacional o xuízo á cúpula do Ministerio do Interior durante o goberno do PP de Mariano Rajoy polo caso Kitchen.
Ata o 30 de xuño serán xulgados o exministro Jorge Fernández Díaz, o exsecretario de Estado de Seguridade Francisco Martínez; o entón director adxunto da Policía (DAO), Eugenio Pino, e varios comisarios, entre eles Villarejo, por poñer en marcha unha presunta operación parapolicial dirixida a subtraer documentos ao extesorero do PP Luis Bárcenas.
A Fiscalía pide para Fernández Díaz e Martínez 15 anos de cadea por dar a orde de espiar ao extesorero para subtraerlle esas posibles probas sensibles para o partido. Para Villarejo solicita 19 anos e para o resto dos acusados, entre 2 anos e medio e 19 anos de prisión.
Os dez acusados da Kitchen
En total, dez son os acusados de poñer en marcha, entre 2013 e 2015, unha engrenaxe de espionaxe parapolicial para subtraer a Bárcenas e á súa familia documentos que puidesen comprometer ao que fóra o seu partido e a algúns dos seus dirixentes en plena investigación do caso Gürtel e da caixa B do PP, para o que se destinarían fondos reservados.
Durante os primeiros días o tribunal dilucidará sobre as cuestións previas. Despois, escoitará a testemuñas como a propia de Cospedal, Mariano Rajoy -quen xa tivo que testificar no primeiro xuízo do caso Gürtel cando aínda estaba a cargo do Executivo-, a exvicepresidenta Soraya Sáenz de Santamaría e ou o senador do PP Javier Arenas.
Bárcenas declarará o 20 de abril no xuízo xunto á súa muller Rosalía Iglesias como prexudicados e pediu unha condena de 41 anos de cárcere para Fernández Díaz e para o seu número dous.
