O xuíz acorda a liberdade de Pablo Crespo, número dous da trama Gürtel

O xuíz de vixilancia penal da Audiencia Nacional decidiu poñer en liberdade a Pablo Crespo, número dous da trama Gürtel, tras cumprir máis de dúas terceiras partes da súa condena, cuxo límite de cumprimento era 18 anos.

Nun auto cuxo contido adiantou o xornal El País e ao que tivo acceso EFE, o xuíz José Luis Castro concedeulle a liberdade condicionada anticipada despois de pasar en prisión máis de 12 anos, os tres últimos en terceiro grao.

Nunha resolución apoiada pola Fiscalía, o xuíz ten en conta "o escaso risco de reincidencia” de Crespo, a antigüidade dos feitos, que se remontan a 2009, e “o tempo de cumprimento efectivo” en prisión.

Valora ademais "a conduta normalizada durante a condena", "o bo uso do réxime aberto", que Crespo desenvolve actividade laboral no exterior, que está a facer fronte aos pagos da responsabilidade civil a través de embargos e pagos mensuais de 100 euros e que "conta con apoio familiar vinculante e positivo".

Con todas esas consideracións, o maxistrado entende que "existe un prognóstico individualizado e favorable de reinserción social, segundo informe da xunta de tratamento", de modo que se cumpren todos os requisitos para outorgarlle o último grao de cumprimento da pena.

A posta en liberdade non será efectiva inmediatamente, senón cando o auto asinado hoxe sexa firme, cousa que ocorrerá dentro de cinco días se, como é previsible, non se presentan recursos contra el.

O auto establece ademais as obrigacións que deberá cumprir Crespo ata a extinción completa da pena, en 2031, como fixar un domicilio de residencia e comunicar calquera cambio do mesmo ao xulgado, ser obxecto dun seguimento por parte do centro onde ata o de agora permanecía en réxime de semiliberdade e a pedir autorización para calquera desprazamento.