Arranca na Coruña BioCultura, o maior escaparate de produtos ecolóxicos

Seis de cada dez galegos consomen produtos ecolóxicos, un sector que non deixa de medrar. E para darlles resposta en Galicia hai máis de 1.500 operadores certificados polo Consello Regulador da Agricultura Ecolóxica. 

En Bubela Artesá fabrican cervexa e pasta. Francisco Fernández é socio nesta iniciativa empresarial e explica que "ecolóxica supón que toda a materia prima está libre de pesticidas e agrotóxicos, coida o solo, non se perde fertilidade, non se contamina acuíferos"

Segundo o último balance do Consello Regulador galego o sector superaba os 113 millóns de facturación. Referentes na produción de alga, mel ou leite.

Marta Álvarez, socia da Cooperativa de Mulleres das Vacas da Ulloa di que reivindican o seu traballo como gandeiras "facemos leite e iogur en envase retornable, que é moi importante nestes tempos, envase de vidro retornable".

Certificados tamén en destinos de ecoturismo, o modelo que más medrou nos últimos anos no sector.

O Xerente de sustentabilidade turística da Reserva de Biosfera Mariñas Coruñesas, Diego López destaca que "todo este turismo está operado cen por cento por empresas locais co que é unha ferramenta de desenvolvemento social e económico e de dinamización do rural".

O ecolóxico xa é máis que un estilo de vida. Chega á moda, á construción ou á cosmética.

Un exemplo témolo na protección solar que fai Almalgama Silvestre. Andrea Fernández conta que conseguiron "o SPF 50. Usamos augas medicinais da zona de Mondariz, cera de abellas de produtores locais e un extracto de algas que se fixo en Galicia con algas galegas".

Ata o domingo agardan que pasen pola Feira BioCultura, en  EXPOCoruña, máis de 13.000 visitantes.