Investigan se o incendio dun coche aparcado nunha rúa de Oural, en Sarria, foi intencionado
Segundo a súa dona, que vive xusto en fronte a onde estaba estacionado o vehículo, prendeulle lume a exparella da súa sobriña
Un incendio calcinou por completo un coche aparcado nunha rúa de Oural, en Sarria. Segundo a súa dona, que vive xusto en fronte a onde estaba estacionado o vehículo, prendeulle lume a exparella da súa sobriña.
"Botoulle gasolina na parte de diante, para que ardese, e rapidamente saíu da miña rúa. Ademais, a miña veciña viu un coche negro aparcado con outro home vixiando", relata Mariluz Muñoz, dona do coche incendiado.
Ata o lugar desprazáronse os bombeiros de Sarria, que evitaron que as lapas se propagasen a unha vivenda deshabitada que si se viu afectada polo fume. Pola súa parte, a propietaria do turismo incendiado temeu que o lume chegase tamén á súa casa.
"Asusteime moito, porque iso comezou a arder coas chamas moi altas, tanto que pensaba que ían entrar no meu cuarto. Sentín moito medo e deume un ataque de ansiedade", sinala a propietaria do turismo.
"Ao chegar vimos que había un incendio completamente desenvolvido no vehículo, que estaba practicamente calcinado. Procedemos a apagalo, pero como estaba pegado a unha vivenda, romperon os cristais dunha ventá, derreteu a persiana e encheuse a casa de fume. Entrouse na vivenda, ventilouse e comprobouse coa cámara térmica que non quedasen puntos quentes", explica José Manuel López, sarxento dos bombeiros de Sarria.
Unha vez presentada a correspondente denuncia, a Garda Civil está a investigar o caso.
