Aparatoso atropelo en Bergondo dun mozo que conducía un patinete eléctrico
Quedou atrapado entre a cuneta e o coche e tardaron máis dunha hora en conseguir liberalo
O mozo sufriu feridas leves
O sinistro ocorreu nunha pista da parroquia de Lubre, no Concello de Bergondo, na tarde deste martes cando un vehículo atropelou por detrás a un mozo que conducía un patinete eléctrico.
"O pulso e toda a man rota, teño as pernas mazadas, puxéronme grampas nunha das pernas e o pescozo..., dóeme moitísimo, a cadeira tamén", así describía Juan as secuelas do accidente.
"Cando me colleu por detrás, porque me deu por detrás, conseguín subir ao capó. Non me agarrei ben de todo, tiven o pé, que se me meteu dentro da roda, apoiado na matrícula. E esvarei, díxenlle que parase, que parase. Non sei se se puxo nervioso. O coche lanzoume contra unha cuneta que había abaixo", engadiu.
Despois do accidente foi unha veciña a que avisou os servizos de emerxencias. Ata o lugar acudiron efectivos de urxencias sanitarias, Protección Civil, a Garda Civil de Tráfico e os bombeiros de Betanzos, que liberaron o afectado nunha intervención de máis dunha hora de duración.
Unha vez foi liberado de debaixo do coche, Juan foi trasladado ao CHUAC, onde quedou ingresado ata recibir a alta este mércores.
