Antonio López seguirá sendo o reitor da USC ata 2026
Encabezaba a única lista que se presentou ás eleccións
Antonio López foi reelixido reitor da USC. A candidatura que encabezaba, a única que concorreu ás eleccións, recibiu 1.636 votos. López dixo estar ilusionado e disposto a traballar para que os próximos sexan catro anos de progreso para a Universidade de Santiago.
A participación media foi de algo máis do 14 %, seis puntos menos que nos anteriores comicios, e con importantes diferenzas entre colectivos: votou o 77,5 % de persoal docente e investigador con vinculación permanente e o 6,2 % dos estudantes.
En total emitíronse 3.847 sufraxios, dos que 2.211 foron en branco. No sector dos alumnos rexistráronse máis votos en branco que a favor da única lista.
Antonio López afronta o novo mandato coa intención de traballar para darlles estabilidade aos investigadores contratados, en favor da remuda xeracional na USC e para avanzar na dixitalización.
