Álex López é o novo director da canteira do Rácing de Ferrol
Ademais de encargarse da canteira tamén desempeñará outras tarefas administrativas relacionadas co fútbol base
A entidade aposta polo talento local e pola identidade ferrolá
Manuel Ansede, presidente do Rácing de Ferrol, anunciou a incorporación de Álex López como novo director da canteira do club ferrolán. Formado na propia canteira, militou en equipos como o R. C. Celta, o Spórting de Xixón ou o Real Valladolid, así como en ligas estranxeiras, como a inglesa e a australiana.
"Como na casa, en ningún sitio. É a realidade. Síntome moi racinguista e para min esta é a miña casa"·
O que fora capitán do Rácing ten moitas ideas en mente para mellorar a entidade, aínda que resalta en varias ocasións que o máis importante é seguir crecendo e que a canteira teña un sentimento racinguista. Entre esas iniciativas destacan a creación dun filial, distintos convenios de colaboración con outros equipos da comarca de Ferrolterra, a implantación dunha liña metodolóxica común e a creación dun equipo sénior feminino.
Nesta nova etapa, Álex contará co apoio do delegado do primeiro cadro, Manolo Mesa, e de Diego Garrido, ata agora responsable da canteira e quen asumirá a dirección do equipo da Liga Genuine.
