Alertas de lume e fume case simultáneas nunha vivenda e un pub de Santiago por causa de deshumidificadores

Os bombeiros de Santiago tiveron que atender dúas alertas de incendio na noite deste luns, e dáse a coincidencia de que nos dous casos a orixe parece estar nuns deshumidificadores. A primeira alarma saltou sobre as catro da mañá nunha vivenda do extrarradio, e a segunda, pouco despois, nun popular local da zona vella que a esa hora xa estaba pechado. Aquí, o traballo dos bombeiros centrouse na evacuación do fume que se concentraba na planta baixa, en que está o escenario para as habituais actuacións musicais da Casa das Crechas. 

A calor e a fumeira afectáronlles a algunhas pezas da instalación de son e iluminación e ao mobiliario máis próximo ao punto de combustión, probablemente un deshumidificador. Tras despexaren o local do intenso fume, os bombeiros centráronse en inspeccionar a estrutura de madeira para evitar posibles riscos para os inmobles lindeiros, algo que se ten sempre moi en conta polas características das construcións da zona histórica de Compostela.