Aviso amarelo este venres en Ourense, Pontevedra e sur de Lugo por calor

A Axencia Estatal de Meteoroloxía (Aemet) activou o aviso amarelo para este venres, 12 de xuño, por temperaturas que poden acadar os 36 graos nas provincias de Ourense e Pontevedra.

En concreto, irá das 13:00 ás 21:00 horas, na zona do Miño de Pontevedra e Ourense, así como nas Rías Baixas. Meteogalicia amplía este aviso amarelo tamén á zona do sur de Lugo, na Ribeira Sacra, con temperaturas máximas de 36 graos.

Meteogalicia explica que este xoves, 11 de xuño, irá entrando unha masa de aire cálido que, xunto cun ceo moi despexado sen nubes, ocasionará que as temperaturas ascendan con forza a partir deste mediodía. Así mesmo, a axencia de meteoroloxía galega advirte de que as xornadas máis cálidas serán o venres e o sábado. Ademais, prevé tormentas no interior durante o domingo.