Alcoa di que non poderá completar en prazo o rearranque en San Cibrao polo apagamento

Alcoa comunicou aos representantes do comité de empresa da súa planta en San Cibrao (Cervo) que, como consecuencia do apagamento xeral que afectou a España e Portugal o pasado 28 de abril, "non vai poder cumprir cos compromisos de rearranque" da fábrica de aluminio "asinados no acordo de viabilidade".

De feito, nun comunicado dirixido aos delegados sindicais, a empresa precisa que "como consecuencia do apagamento", nin sequera pode asegurar que "exista entre o 1 de outubro de 2025 -data fixada para o rearranque das cubas no acordo- e o 31 de decembro de 2026, unha produción mínima do 75 % da capacidade total da planta".

Ademais, a multinacional estadounidense recoñece que continúa avaliando "o alcance" das repercusións do apagamento, o que levou á compañía a enviar notificacións "de forza maior" a "clientes e provedores", segundo o comité de empresa.

Nun comunicado, os representantes dos traballadores precisan que foron convocados este martes pola dirección de Alcoa para unha reunión que tivo lugar este mércores nas instalacións da planta, con participación de directivos da multinacional norteamericana e a enerxética Ignis.

Nesa reunión, precisa o comité, Alcoa felicitou ao persoal "pola profesionalidade e dilixencia demostradas tras o apagamento", que permitiron "recuperar a normalidade na planta de alúmina case ao 100 %", ademais de salvar "14 cubas" de aluminio das "41 que arrincaran" o 28 de abril.

"Para retomar o arranque, Alcoa necesita que se coñezan as causas do apagamento, condicionando o mesmo a que se comuniquen todas as medidas tomadas polas administracións para garantir que non se volva a producir", precisa o comité que lles trasladou a empresa.

Tamén, aclara, é preciso coñecer "as compensacións para mitigar os sobrecustos xerados na parte de compensación da factura eléctrica".

A representación dos traballadores explica que a empresa lles comunicou que "polo momento se mantén a estrutura organizativa de rearranque nos departamentos implicados" e que confía en que esta situación "se resolva nas próximas semanas".

A Xunta culpa o Goberno

A conselleira de Economía e Industria, María Jesús Lorenzana, responsabilizou ao Goberno da "consecuencia dramática" en Alcoa do apagamento, tendo en conta que a empresa comunicou que non poderá cumprir os compromisos asinados para o rearranque das cubas "por causa de forza maior".

"Estamos a ver que agora mesmo máis de mil postos de traballo están en dúbida na Mariña de Lugo a consecuencia precisamente de que o Goberno de España non é capaz de dar unha estabilidade á conexión eléctrica da nosa industria". lamenta a conselleira.

Apunta que a compañía manifestou "con claridade" que non vai poder cumprir os compromisos que tiña adquiridos de rearranque "a consecuencia directa e exclusiva do apagamento producido".

"Lamentamos moitísimo as consecuencias que estamos a empezar a ver que para a industria galega están a darse polo apagamento producido hai unhas semanas", asevera Lorenzana.

Así, a conselleira pide "claramente" ao Goberno central que "dunha vez por todas" dea explicacións á cidadanía e ás empresas das causas do apagamento e que "dea estabilidade" á industria.

"Levamos advertindo xa durante máis dun ano que a estabilidade da rede de transporte eléctrico é clave para manter os investimentos actuais e atraer novos investimentos e atopámonos agora cunha consecuencia dramática do sucedido respecto do apagamento producido", expresa.

Nesta liña, requírelle o Ministerio de Industria que "fale dunha vez por todas" co Ministerio de Transición Ecolóxica e "que esa comisión de investigación, que se chama independente e que está presidida pola propia ministra, dea explicacións a todos os españois de cales foron as razóns do apagamento". 

En concreto, tras o apagamento, só puidéronse salvar 14 das 41 cubas que estaban arrincadas na planta de aluminio de San Cibrao.