Albares critica a Machado por non querer reunirse co presidente español
A opositora venezolana defende a súa posición fronte as "agresións", di, do Goberno español
María Corina Machado continúa coa súa axenda en España. Nela non hai ningún encontro co Goberno de Pedro Sánchez.
Nunha entrevista en RNE, o ministro de Exteriores criticou a súa decisión. Para José Manuel Albares, "ela escolleu actuar como unha líder ideolóxica e por iso decidiu reunirse só cunha parte do espectro político, coa extrema dereita española".
As palabras de Albares chegaron a oídos da opositora venezolana.
"As declaracións recentes e as agresións que se viron nestas últimas horas explican moi ben a decisión de ter certas reunións e outras non", aseguroulle María Corina Machado aos xornalistas.
A primeira hora si estivo acompañada dun socialista, de Felipe González. Preguntarónlle ao expresidente que opina de que Machado non quixese reunirse con Sánchez. "Puido facelo", respondeu.
O Goberno e os seus socios critican a postura da premio Nobel. Para o ministro Pablo Bustinduy, "ela reunirase con quen queira, pero é incomprensible". Para Pablo Fernández, voceiro de Podemos, "é unha falta de respecto".
Pero para o líder do PP, a premio Nobel da Paz acertou. Alberto Núñez Feijóo cre que "non ten ningún sentido" que Machado se reúna cun presidente "que compadreou e segue compadreando co réxime de Maduro".
No que si coinciden o Goberno e a venezolana é en condenar os cánticos racistas que se escoitaron en Madrid o sábado pasado.
