Airbus contrata tecnoloxía galega para algúns dos seus avións

Vai poñer un sistema de busca e persoas nos avións. Airbus contratou o sistema de busca de persoas desenvolvido pola empresa viguesa Centum, o Lifeseeker, para os avións de vixilancia marítima que lle comprou o Ministerio de Defensa español.

"Primeiro, é un contrato moi significativo para nós e no noso país, que iso sempre axuda cando vas fóra; e, por outro lado, permitirá, que unha vez integrado neses avións, Airbus o poida vender a outros clientes arredor do mundo", subliña o director xeral de Centum, Héctor Estévez.

En vez de buscar persoas visualmente, o Lifeseeker detecta, identifica e xeolocaliza o teléfono móbil dos desaparecidos.

"Podemos facer buscas en quince minutos, en vinte minutos, media hora. Nada que ver coas longas buscas que ás veces tardan días", explica Héctor Estévez.

O produto estrela de Centum ten clientes en máis de vinte países de catro continentes. 

"Por exemplo en Europa, a xendarmería en Francia, a forza aérea suíza, a forza aérea alemá, os bombeiros nacionais de Italia... Tamén temos equipos en Lituania, en Letonia, en Grecia...", enumera o director xeral de Centum.

Os usuarios deste sistema de busca informan con frecuencia a Centum de rescates de éxito.

"Acumula centos e centos de casos de rescates realizados con esta tecnoloxía", puntualiza o responsable da empresa.

África é o único continente onde non chegou o Lifeseeker, pero en Centum esperan facelo pronto.