Acusan o humorista británico Russell Brand de dous novos delitos de violación e agresión sexual

A Policía Metropolitana de Londres imputou dous novos cargos de violación e agresión sexual ao actor e humorista británico Russell Brand.

As novas acusacións engádense ás xa formuladas en abril de 2025 por feitos relacionados con ata catro mulleres.

Nese momento, as autoridades imputáronlle dous delitos de violación, un de agresión indecente e dous de agresión sexual.

A investigación comezou en setembro de 2023, tras varias denuncias recibidas despois da publicación dunha investigación xornalística con testemuños de catro mulleres.

Segundo a Policía, os feitos denunciados producíronse entre 1999 e 2005.

Entre as acusacións figuran unha presunta violación a unha muller en 1999 en Bournemouth.

Tamén consta unha agresión sexual en 2001.

As denuncias inclúen ademais unha violación por vía oral e unha agresión sexual en 2004.

Outra agresión tería ocorrido entre 2004 e 2005.

As tres últimas sitúanse na zona de Westminster, en Londres.

A investigación continúa aberta.

O humorista di que foron relacións consentidas

Brand negou as acusacións penais nun vídeo publicado nas redes sociais.

O humorista recoñeceu unha etapa de promiscuidade, pero afirmou que todas as relacións sexuais foron consentidas.

Declarouse non culpable dos cinco primeiros cargos en maio.

Está previsto que compareza ante un tribunal o próximo 20 de xaneiro polos dous novos cargos.