Activos incendios forestais sen control en Ponteareas, Carballo e A Laracha
Os da Laracha e Carballo xa son un único lume activo e obrigaron a cortar a estrada DP-1909, entre os quilómetros 12 e 15, debido á falta de visibilidade provocada polo intenso fume
No do Monte Galleiro, en Ponteareas, foi necesario o desaloxo dun home con mobilidade reducida
Ata o momento queimáronse 40 hectáreas en conxunto
Lume no Monte Galleiro, Ponteareas. EFE/Sxenick
Dous incendios forestais permanecen activos esta tarde de luns en Galicia: no municipio pontevedrés de Ponteareas e nos coruñeses da Laracha e Carballo. En total, son máis de 40 hectáreas afectadas polas lapas, segundo a última actualización das 17,00 horas da Consellería do Medio Rural.
O lume de Ponteareas afecta o monte Galleiro, na parroquia de Ribadetea. Está activo desde as 14,47 horas, con máis de 20 hectáreas arrasadas polo momento. Traballan tres avións, dous helicópteros, 15 brigadas, 7 motobombas, 10 axentes, 1 pa e 1 técnico.
A alcaldesa de Ponteareas, Nava Castro, explicou que os medios "están tentando controlar" o lume, pero a situación está "complicada" polo vento. Indica que o lume se ocasionou polo incendio dun tractor que se propagou polos fortes refachos.
Castro informou tamén que houbo que desaloxar por precaución a un home con mobilidade reducida no lugar de Mouro. O fume percíbese desde o aeroporto de Peinador pero non afecta á terminal, segundo informou Aena.
Un único lume activo en Carballo e A Laracha
Os incendios forestais da Laracha e Carballo uníronse na tarde deste luns e xa queiman máis de vinte hectáreas, segundo informou a Consellería do Medio Rural.
O lume de Carballo empezou na parroquia de Noicela ás 14.18 horas, mentres que o da Laracha, en Caión, está activo desde as 13.13 horas, segundo explica a Garda Civil.
Ambos os lumes xa están unidos e representan un único incendio activo no que traballan 4 axentes, 1 brigada, 1 motobomba, 2 técnicos, 1 helicóptero, 3 unidades técnicas de apoio e 4 avións.
Lume no municipio de Carballo. TVG
As lapas teñen unha fronte que supera os dous quilómetros, segundo datos da Garda Civil, que explica que arden monte arboredo e raso.
O lume ameaza xa algunhas vivendas e o camping As Névedas, en Carballo, que está aberto e con clientes.
O incendio forestal obrigou a cortar a estrada DP-1909 entre os quilómetros 12 e 15, o tramo que une Caión coa Laracha, debido á falta de visibilidade provocada polo intenso fume.
Mentres, está controlado desde as 15,39 horas, iniciouse ás 14,19 horas, un lume en Vigo, parroquia de Lavadores. Afecta a 0,2 hectáreas de monte raso.
