Acordo no Congreso para ter listo en maio un relatorio sobre o traspaso da AP-9
Queren pedir a transferencia da titularidade á AP-9, e non só da xestión, tal e como aprobou o Parlamento de Galicia
Os grupos parlamentarios que forman o relatorio sobre a lei de traspaso da AP-9 constituído hai un mes no Congreso acadaron este mércores un compromiso para acordar antes de que remate o mes de maio un texto que de forma inmediata se poida aprobar.
O deputado do BNG, Néstor Rego, informou deste acordo despois da reunión a porta pechada do relatorio e explicou que ata entón os grupos continuarán falando.
Rego indicou que o BNG defende que o texto que saia do relatorio do Congreso respecte o acordo unánime do Parlamento de Galicia "xa en catro ocasións", segundo o cal se debe producir a transferencia da titularidade á AP-9 e non só da xestión.
Debe quedar claro ademais, subliñou, que todas as obrigas e responsabilidades derivadas das actuacións do Goberno do Estado nos anos que leva sendo titular da autoestrada continuarán correspondendo ao Goberno central, de maneira que a Administración galega non teña que asumir "cargas que non lle corresponden".
"Nós entendemos que o lóxico sería aprobar a lei tal e como saíu do Parlamento de Galicia, por iso non presentamos emendas", manifestou.
O Congreso dos Deputados celebrou o pasado 26 de marzo a sesión constitutiva do relatorio sobre a lei de traspaso da AP-9, tras as críticas do PPdeG e o BNG polo atraso nesta tramitación.
.png)
