Abandonan un bebé de poucos días no portal dun edificio de Sevilla

A Policía Nacional investiga o achado dun bebé de poucos días de vida, que foi abandonado sobre as 14:00 horas do pasado luns nun portal dun edificio de Sevilla.

Segundo adiantou Diario de Sevilla e confirmaron a EFE fontes policiais, o meniño foi atopado por uns veciños de rúa Cráter, na barriada Madre de Dios.

Mentres algúns dos veciños chamaban a emerxencias, outros compraron leite e cueiros, á espera de que fose atendido posteriormente dunha forma máis concreta.

O bebé, que aparentemente se atopaba ben, foi trasladado ao Hospital Virgen del Rocío, onde actualmente se está a seguir o protocolo habitual nestes casos, mentres se tramita o seu "desamparo provisional"

De forma paralela búscase a seus pais, para o que, estre outros aspectos, están a rastrexarse os rexistros de nacementos nas últimas semanas na capital andaluza.

O Diario ABC de Sevilla informa da declaración dunha veciña do barrio que asegura identificar a nai do neno, que segundo o seu testemuño, abandonaríao por ser froito dunha agresión sexual. "Non o quería porque era produto dunha violación", declara Verónica a ABC, quen xa notificou a conversa que mantivo coa muller a Policía.

Verónica asegura a este medio que a nai do rapaz é unha "toxicómana do barrio" e que o parto foi no coche dun amigo, cortando ela mesma o cordón umbilical. A testemuña informa de que a muller quería entregar o bebé a "calquera familia", ao que ela lle suxeriu que o levase a un hospital.

ABC afirma que a nai do neno lle deu o seu número de teléfono á testemuña, pero esta afirma "non atopalo" por máis que o busca. 

Con respecto á familia que podería acollelo, fontes da Consellería de Igualdade, Políticas Sociais e Conciliación da Xunta de Andalucía informaron a EFE que se busca unha que poida ter "unha garda con fins de adopción", xa que podería darse o caso de que, finalmente, quedasen coa custodia de forma permanente.