Abanca expón en Madrid unha ampla selección do seu fondo escultórico

Abanca inaugurou este martes na Galería Casa de América de Madrid a exposición ‘Espazo e tempo. A escultura na colección Abanca’, que percorre a historia desta disciplina desde finais do século XIX ata a actualidade a través de 50 obras da súa colección propia.

Entre os 41 artistas que están representados hai nomes como Eduardo Chillida, Susana Solano ou Francisco Leiro, que dialogan coa obra de pintores como Pablo Picasso ou Joaquín Torres García.

A mostra, que se poderá visitar ata o 23 de maio, empeza cronoloxicamente na escultura de Galicia cara a finais do século XIX e principios do XX, época que aparece representada polo modernismo de Rafael da Torre Mirón e o rexionalismo de Isidoro Brocos.

O comisario da exposición e responsable de equipo e xestión artística de Abanca, Diego Cascón, explicou que se estableceu “unha revisión, un novo diálogo” entre os fondos escultóricos máis destacados da colección e tamén subliñou a novidade de que estes conversen coas pinturas.

“Historicamente a escultura sempre estivo supeditada a outras artes como pode ser a arquitectura, e en certo xeito a pintura tivo prioridade”, dixo para engadir que, nesta ocasión, “as esculturas son as protagonistas e hai unha serie de obras en parede, pinturas, unhas obras que dialogan coas esculturas”.

Aínda que as obras se dispuxeron en orde cronolóxica a través de tres plantas, Cascón enxalzou “a potencia” de cada unha delas e “a presenza dos autores”, que permiten por tanto “liberdade” á hora de visitar as salas e contemplalas na orde que cada persoa desexe.

Así pois, pódese atopar unha sección dedicada á escultura española de mediados do século XX, desde a posguerra ata os anos 70, en que as obras de Chillida se unen ás de Baltasar Lobo ou Jorge Oteiza.

O percorrido termina con obras que romperon a concepción tradicional da escultura en procura de experiencias sensoriais e emocionais, como a expresividade de Francisco Leiro, as esculturas de chapa e arame de Susana Solano e a narratividade de Juan Muñoz e Julião Sarmento.

Entre as obras máis destacadas, os organizadores sinalaron a peza cubista de ferro de Julio González, “un dos grandes da escultura do século XX”.

Ademais, na mostra ‘Espazo e tempo’, Abanca realizou un modelado 3D de todas as esculturas, de forma que se poidan visitar de forma dixital e con alta calidade mediante un visor interactivo en calquera dispositivo móbil ou navegador web.