A Xunta convoca axudas de ata 4.000 euros para mercar vehículos eléctricos ou de baixas emisións

A Consellería de Economía e Industria, a través do Inega (Instituto Enerxético de Galicia) convoca este mes de xaneiro unha nova edición do programa Renova o teu vehículo para a compra de turismos ou furgonetas eléctricas ou de baixas emisións dirixido a particulares e empresas.

O programa conta cun orzamento de 3,5 millóns de euros e prevé que permita a adquisición duns 1.600 automóbiles eficientes. As axudas poden chegar ata os 4.000 euros, incluso os 4.600 no caso das familias numerosas.

Para participar nesta campaña os concesionarios deben adherise como entidades colaboradoras, para o cal xa está o prazo aberto. Deste xeito, a Administración galega fai o pagamento da axuda directamente ao establecemento de venda, e o beneficiario xa recibe o desconto no momento da adquisición.

Estas subvencións apoian a adquisición de turismos ou furgonetas cun custo non superior aos 47.000 euros (impostos incluídos) se se trata dun automóbil eléctrico.

Ademais para beneficiarse da axuda hai que acreditar a baixa definitiva de circulación dun vehículo, que irá ao despezamento, cunha antigüidade de, polo menos, dez anos no caso dun turismo ou de cinco se é unha furgoneta.