A Xunta avanza unha aplicación móbil que mostrará as illas de calor das cidades e recomendacións
Permitirá recibir unha serie de recomendacións para minimizar os efectos da calor
O obxectivo é que "as persoas máis vulnerables por motivos de saúde teñan a opción de gozar do día e non só saír pasear pola noite", segundo a conselleira de Medio Ambiente
Di que Galicia se converte nunha das primeiras comunidades que, cunha metodoloxía baseada na intelixencia artificial, avanza nas medidas necesarias para detectar as illas de calor e os refuxios climáticos
A conselleira de Medio Ambiente e Cambio Climático, Ánxeles Vázquez, avanzou que a Xunta deseñará unha aplicación móbil que permitirá "coñecer de primeira man as illas de calor das cidades, os espazos verdes e refuxios climáticos", así como recibir unha serie de recomendacións para minimizar os efectos da calor. Vázquez prevé que estea operativa para decembro.
Nun acto en Ourense este xoves, a titular de Medio Ambiente anunciou a última fase do proxecto de refuxios climáticos mediante os que se pretende que "as persoas máis vulnerables por motivos de saúde teñan a opción de gozar do día e non só saír pasear pola noite".
Dispositivo de captura de variables meteorolóxicas
Así mesmo, a Xunta ampliou nunha nota de prensa que comeza a segunda parte do convenio co Concello e a Universidade de Vigo, pola cal a Xunta deseñará un dispositivo de captura de variables meteorolóxicas --que os habitantes poderán levar encima-- para avaliar e facer propostas de illas de calor, refuxios climáticos e zonas de preservación da biodiversidade, que será probado de forma piloto en Ourense.
Isto, declarou a conselleira "non é casual", e débese a que neste mes de xuño, no que se experimentaron unhas temperaturas "históricas", Ourense situouse varios días cinco graos por encima da media, superando os 40º.
Ademais, engadiu que, posteriormente a ser probada na cidade, poderá replicarse noutros concellos a través da 'Rede local polo clima'.
Desta maneira, destacou Vázquez, Galicia convértese "nunha das primeiras comunidades autónomas que cunha metodoloxía baseada na intelixencia artificial", avanza para tomar as "medidas necesarias no verán para detectar as illas de calor e os refuxios climáticos dos territorios".
