Temperaturas de verán no sur de Galicia en pleno mes de outubro
Verán no litoral das Rías Baixas en pleno mes de outubro. A cidade de Pontevedra rexistrou 30 graos este domingo, e na costa non baixou dos 26 graos
O mar calmo e a ausencia de vento convidou a gozar da praia e as terrazas
En Ourense, o outono trai temperaturas de 30 graos. Son valores moi elevados para esta época, un tempo ata para tomar o sol ao carón do Miño
A estampa que presentaban as praias neste domingo non difire en nada dun típico día de verán. Corpos ao sol sobre a area e tamén a remollo no mar, que estaba máis ben fresquiño, con 16 graos, temperatura normal para a época. Non o é tanto a calor que se rexistra fóra da auga, con valores que chegaron aos 30 graos en Pontevedra, e que non baixaron dos 26 nas Rías Baixas.
Estes díxitos estivais vanse manter, segundo as previsións, para as próximas xornadas en case todo o país. Unha situación meteorolóxica que é boa para o lecer, pero non tanto para a terra.
A chuvia nin está nin se agarda durante a semana vindeira, agás no interior. Xa que logo, mar calmo e vitamina D en abundancia, iso sí, cun índice ultravioleta en niveis moderados.
Segue o tempo de verán en outono en Ourense con temperaturas de 30 graos
Poderían ser imaxes de arquivo de calquera día de verán, pero así de ateigada está a case mediados de outubro a zona termal da Chavasqueira na ribeira do Miño, en Ourense. Con Sol e calor.
A cidade máis quente de Galicia segue este outono con 27 graos á sombra, e ao sol a máxima chegou ata os 30 graos e medio. Un tempo seco e caloroso que deixa moitas contrastes na rúa, con manga longa e tamén moitas mangas e pantalóns curtos. E tamén moi bo ambiente e o bo humor que dá a luz do sol.
"Eu quero o calorciño, é bo, o calor é bo. Estase ben? Estase ben... tiña que vir a auga para as verduras, para as castañas, para os nabos, a auga facía moita falta, pero hai que aguantar o que hai".
