Redes de apoio locais colaborarán para detectar casos vulnerables de persoas que están soas
A Xunta aproba a Estratexia para atender a soidade non desexada
Este mesmo mes unha liña telefónica xestionada pola Cruz Vermella comezará a facer seguimento de persoas que viven soas
O Consello da Xunta aprobou este luns a Estratexia galega para a atención á soidade non desexada. Este programa está dotado con máis de 145 millóns de euros, que inclúe a posta en marcha este mesmo mes dun teléfono de atención, que xestionará a Cruz Vermella.
Segundo explicou o presidente da Xunta, moitas das medidas desta Estratexia están xa en marcha, pero destacou entre as novidades a posta en marcha de redes de apoio local, entre as que se trata de implicar a comercios de barrio, establecementos hostaleiros, farmacias, carteiros, e asociacións veciñais e sociais, para detectar situacións de vulnerabilidade ou illamento.
Destacou a conselleira de Política Social e Igualdade, Fabiola García, que a Estratexia ten varios eixos que resumiu en detección, sensibilización, prevención e intervención. Case un 21 % das persoas maiores de 65 anos viven soas, destacou García.
Nese sentido, explicou que se vai elaborar un protocolo e un censo para rexistrar os casos, cunha ventá única para uniformar a carteira de servizos como son o de axuda no fogar ou os traballadores sociais, que se implicarán tamén na detección dos casos.
Ademais vanse realizar campañas informativas e promoveranse actividades interxeracionais, e tamén rutas culturais, acompañamento dixital e ampliarase o carné +65.
Por outro lado tamén se vai facilitar a implantación de vivendas de uso compartido, tanto en ámbito rural como urbano. E, na liña de crear as redes de apoio local, crearanse programas de voluntariado e tamén as figuras de coordinadores de barrio e parroquiais como interlocutores.
A posta en marcha do servizo telefónico multicanle, que xestionará a Cruz Vermella, servirá para facer un seguimento constante das persoas que decidan ser chamadas varias veces á semana para falar, cun público obxectivo inicial de 1.000 persoas maiores de 65 anos.
