Galicia duplicou o número de expedientes favorables de dependencia e discapacidade

Galicia duplicou o número de expedientes favorables de dependencia e discapacidade entre xaneiro e xuño deste ano, respecto ao mesmo período de 2024. Son un total de 42.500 novos expedientes: 30.000 de discapacidade e 12.500 de dependencia.

Confirmouno o presidente, Alfonso Rueda, na comparecencia de prensa posterior ao Consello da Xunta. Segundo dixo, o obxectivo é chegar aos 90.000. Segundo Rueda, Galicia é a comunidade onde máis aumentou o número de persoas atendidas nos últimos doce meses.

"Máis de 22.500 millóns de euros que están gardados nun caixón"

No Consello, o presidente da Xunta avanzou que Galicia executou xa o 85% dos fondos do Mecanismo de Recuperación e Resiliencia (MRR) concedidos a Galicia. Á nosa comunidade correspóndenlle 1.745 millóns de euros e deles xa recibiu 1.631. "Faltan por chegar 114 millóns", sinalou o presidente.

Ademais, o xefe do executivo galego afirma que o Goberno central ten sen adxudicar máis da metade dos fondos que lle corresponden á nosa comunidade.

"Mentres Galicia cumpre, non ocorre o mesmo cos fondos que son xestionados ao 100% polo Goberno central a través dos PERTE. Aínda están sen adxudicar máis da metade deses fondos (o 55%), ou o que é o mesmo: máis de 22.500 millóns de euros que están gardados nun caixón en lugar de contribuír ao progreso económico e ao benestar".

Os alcaldes do Porto e Braga, Medalla de Ouro de Galicia

Na reunión de hoxe, o Consello da Xunta acordou outorgar a Medalla de Ouro de Galicia aos alcaldes do Porto, Rui Moreira, e de Braga, Ricardo Río. Súmanse ás entregadas este luns á princesa Leonor.

Segundo explicou o presidente Alfonso Rueda, "trátase dun recoñecemento a dúas persoas que representan o espírito de cooperación entre Galicia e o norte de Portugal" e son "aliados fundamentais" para reclamar o corredor atlántico de alta velocidade.

As medallas entregaranse o vindeiro 24 de xullo.

Investigación

 Ademais, a Xunta vai destinar 53 millóns de euros a impulsar que o coñecemento que sae dos laboratorios pase á empresa e á sociedade. Haberá axudas para que, por exemplo, pequenas e medianas empresas colaboren con centros tecnolóxicos en proxectos de investigación. Tamén haberá apoios para mellorar as infraestruturas tecnolóxicas que faciliten esa transferencia de coñecemento.