A Xunta informa a galegos no Brasil das oportunidades laborais para retornar
Os asistentes entran en contacto con empresas galegas para coñecer as oportunidades laborais que lles ofrece Galicia en sectores estratéxicos
O obxectivo é que galegos do exterior poidan retornar cun contrato de traballo
A Xunta de Galicia celebra esta fin de semana a súa feira de emprego no Brasil, coa que pretende que a cidadanía galega afincada neste país coñeza as oportunidades laborais que ofrecen na Comunidade sectores estratéxicos como o metalmecánico, naval, enerxías renovables ou TIC.
Ata alí viaxou o conselleiro de Emprego, Comercio e Emigración, José González, acompañado polo secretario xeral da Emigración, Antonio Rodríguez Miranda. Ambos acudiron o sábado (segundo día da viaxe) á sede dá Sociedade Hispano-Brasileira Casa de Espanha de São Paulo, onde se celebrou a primeira das xornadas da feira, que finalizará este domingo en Salvador de Baía.
"Estamos desbordados polo éxito da afluencia de público", valorou González nun audio remitido aos medios.
Inicialmente, estaban inscritas 600 persoas, pero finalmente a asistencia achegouse ao milleiro, segundo trasladou o responsable autonómico.
Na iniciativa, as persoas asistentes entran en contacto directo coas empresas e agrupacións industriais galegos participantes na feira, o que está dirixido a "afinar os procesos de selección" en postos de traballo acordes aos perfís dos participantes e a afrontar retos como a cobertura de vacantes e a remuda xeracional.
Ademais, participan en actividades, charlas e talleres prácticos impartidos por persoal de distintos departamentos da Xunta e relacionados coa estratexia 'Galicia Retorna' e o acompañamento integral que abarca, a procura de emprego e o emprendemento, debullou a Consellería.
70 empresas e máis de 500 postos de traballo
"En 'Retorna Cualifica Emprego' , temos xa compromisos de contratación de empresas galegas e coñecemos aos galegos do exterior que queren retornar á súa terra", explicou González.
En concreto, dentro da terceira edición deste programa, hai 70 empresas que están a ofertar, en total, máis de 500 postos de traballo.
Ademais, o responsable autonómico manifestou que o seu departamento busca que este retorno se produza cunha inserción laboral, é dicir, que as persoas que o fagan "veñan con contrato de traballo".
