A Xunta achega 12 millóns de euros para construir a rolda sur-oeste de Ordes

A Xunta de Galicia investirá 12 millóns de euros na rolda sur-oeste de Ordes para reducir o tráfico pesado que circula polo centro da vila. 

A circunvalación, cunha lonxitude aproximada de dous quilómetros, permitirá mellorar os accesos ao IES Maruxa Mallo, ao tanatorio ou ao punto limpo. O proxecto prevé tamén a construción dunha senda peonil e ciclista co obxectivo de fomentar unha mobilidade máis sostible e segura na zona

A conselleira de Vivenda e Planificación de Infraestruturas, María Allegue, visitou este luns a localidade para informar do avance na tramitación desta infraestrutura, da que destacou que se trata dun proxecto no que o departamento que dirixe leva tempo traballando co estudo de alternativas de trazado e de avaliación ambiental.

Aberto ata o 23 de marzo o prazo para presentar alegacións 

O Consello da Xunta deu luz verde o pasado 26 de xaneiro a aprobación provisional da rolda e desde o 9 de febreiro está sometido a información pública. Ata o vindeiro 23 de marzo estará aberto o prazo para presentar alegacións. 

A nova circunvalación de Ordes parte da estrada N-550, onde o Ministerio de Transportes prevé a execución dunha rotonda, e rematará na vía autonómica AC-413. A conselleira María Allegue salientou que esta actuación responde o compromiso da Xunta de "seguir vertebrando Galicia a través das infraestruturas, investindo, conservando e mellorando cada ano a rede viaria autonómica".