A Universidade da Coruña rompe o acordo para descentralizar Medicina ao non ratificalo a USC

A Universidade da Coruña (UDC) decidiu retomar o impulso do seu propio grao de Medicina despois de considerar roto o acordo de descentralización, que non saíu adiante porque o Consello de Goberno da Universidade de Santiago (USC) non ratificou o texto previsto na súa reunión deste venres.

A UDC lamenta o desenlace dunha sesión en que a USC evitou votar o acordo pola oposición mostrada pola Facultade de Medicina, polas candidatas ao Reitorado e polo Consello de Estudantado. O reitor, Antonio López, optou por non someter o texto a votación co obxectivo de abrir un novo diálogo co centro académico.

A UDC defende que actuou con lealdade institucional

A Universidade da Coruña sinala que non é posible manter o pacto sen a ratificación dunha das partes e expresa o seu “profundo” pesar pola situación.

Destacan que a UDC foi a primeira institución en avalar o documento de descentralización, malia ter xa expectativas de contar cun grao propio, e aceptou pausar ese proxecto para facilitar o consenso.

No comunicado, a institución lamenta que o sucedido deixe sen efecto “moitas horas de traballo” destinadas a construír un texto dialogado que permitise aplicar a descentralización e aproveitar os recursos do sistema sanitario e universitario galego.

A universidade reivindica que actuou con “lealdade ao sistema universitario de Galicia e respecto institucional”.

Retoma o proxecto para unha facultade propia

Tras considerar o acordo como roto, a UDC anuncia que continuará os traballos para desenvolver a súa propia titulación en Medicina.

Sostén que esta opción permite atender a demanda existente e avanzar nun modelo formativo adaptado ás necesidades actuais do sistema universitario e sanitario galego.