Publicador de contidos

Publicador de contidos

A traxedia do hotel Saratoga suma trinta persoas falecidas

A traxedia do hotel Saratoga suma trinta persoas falecidas

Os equipos de emerxencia sospeitan que podería haber xente atrapada no soto do edificio

G24.gal 08/05/2022 08:39 Última actualización 08/05/2022 20:48

A explosión por un escape de gas no hotel Saratoga da Habana suma xa 30 persoas falecidas, incluíndo unha moza de Viveiro, ademais de deixar 84 feridas.

Estas cifras son provisionais e poderían seguir elevándose nas próximas horas, porque os labores de desentullo no edificio proseguen e aínda se buscan varias persoas, na súa maioría traballadores do hotel.

O obxectivo dos equipos de rescate segue sendo acceder ao soto, porque se sospeita que alí podería haber algunha persoa atrapada.

O presidente cubano, Miguel Diaz-Canel, que volveu este sábado visitar o lugar dos feitos, indicou en declaracións aos medios que hai "indicios de que poida" haber máis persoas no interior. "Avanzar custa moito traballo", explicou.

O gobernador da provincia da Habana, Reinaldo García Zapata, indicou a este respecto en rolda de prensa que o chan da planta baixa e o primeiro piso colapsaron sobre o soto.

"Traballouse ininterrompidamente ata o de agora e así continuaremos traballando ata que rescatemos a última persoa que poida estar baixo os entullos", asegurou.

O Goberno español lamentou a morte na explosión dunha nacional, a galega Cristina López-Cerón Ugarte, de 29 anos. 

Segundo o Ministerio de Saúde Pública (Minsap), os falecidos tiñan entre 10 e 77 anos. Do total de persoas feridas, 24 permanecen hospitalizadas. 

Con respecto aos desaparecidos, o gobernador da Habana indicou que se están buscando varias persoas que se poderían atopar entre os entullos.

Entre eles están ao redor dunha ducia de traballadores do hotel, como explicou en conferencia de prensa o delegado do grupo turístico estatal cubano Gaivota, Roberto Enríquez Calzadilla.

Escape de gas

Segundo o Goberno cubano, as pescudas preliminares apuntan a un escape de gas. Unha comisión está a investigar os feitos. No momento da explosión un camión cisterna de gas licuado estaba aparcado fronte ao hotel e recargando un depósito do hotel. Crese que a mangueira podía ter unha fisura.

A explosión fixo que colapsara unha sección do edificio -de sete alturas- e que se desprendera a fachada dos tres primeiros pisos, o que provocou unha choiva de toneladas de entullo sobre unha beirarrúa habitualmente concorrida.

Outros 17 edificios lindeiros víronse afectados polo accidente e nos próximos días realizaráselles unha avaliación técnica a tres bloques e ao propio hotel para ver se son "salvables" ou é preciso demolelos.

Publicidade
Publicidade
Publicidade