Dous detidos por un intento de roubo nun banco en Santiago

Os asaltantes actuaron de noite, seguramente coa axuda dunha maza para facer o burato e coarse no interior da oficina na sucursal bancaria da praza da Mercé, no barrio de Conxo. Polo menos dous homes agardaban ao director da entidade coa idea de reducilo e perpetrar o atraco.

Puideron acceder desde os garaxes ou desde o propio portal con certos sinais de que foi forzada. Actuaron con rapidez e sen facer ruído, xa que ningún dos veciños escoitou nada a pesar de durmir coas fiestras abertas.

"Estamos horrorizados, que unha cousa así suceda no noso portal e nós sen decatarnos. Non escoitamos nada, e iso que tiñamos toda a casa aberta, foi unha noite de durmir mal coa calor, e nada, non nos decatamos", di unha veciña.

Finalmente os delincuentes decidiron abortar o plan ao escoitar que o director chegaba acompañado dun empregado e a oficina permaneceu pechada ao público toda a mañá do luns.

As forzas de seguridade non tardaron moito en detelos na comarca do Salnés e trascendeu que xa estaban a ser vixiados pola policía de Vigo como presuntos autores doutras accións delitivas.