A Policía instala unha furgoneta diante da comisaría de Santiago para expedir DNI e pasaporte
Neste punto poderanse facer trámites de urxencia ata o luns, debido aos danos provocados nas instalacións polo incendio deste xoves
A oficina de denuncias e Atención ao Cidadán atenderá unicamente os delitos graves contra as persoas e non estará dispoñible para trámites menores
As dependencias foron inspeccionadas este venres e decidiuse precintar as plantas inferiores e limpar as destinadas á atención ao público
A Policía Nacional instalará un punto móbil no exterior da comisaría de Santiago que funcionará como punto de información á cidadanía tras o incendio rexistrado nas súas instalacións este pasado xoves. O incidente obrigou a modificar a operativa.
Así, a Oficina de Expedición de DNI/Pasaportes atenderá exclusivamente nos casos de urxencia, ata o luns, na furgoneta instalada na avenida Rodrigo de Padrón, no exterior das dependencias policiais. A Oficina de Denuncias e Atención ao Cidadán unicamente atenderá os delitos graves contra as persoas e non estará dispoñible para trámites de entidade menor.
O Negociado de Estranxeiros non terá acceso aos equipos informáticos en principio ata o mércores, día 18 de febreiro. En caso de urxente necesidade, atenderase na Oficina de Estranxeiría da Comisaría Provincial da Coruña situada na rúa Médico Devesa Núñez, nº4.
"Cando as condicións técnicas o permitan, renovaranse as actividades operativas dos distintos grupos", asegura a Policía Nacional nun comunicado. O lume orixinouse nunha zona de práctica de tiro da planta inferior onde había pneumáticos almacenados. Tras máis de oito horas de traballo, os bombeiros conseguiron sufocado.
Labores de inspección e precinto de varias plantas
Despois de que o incendio quedase extinguido na tarde do xoves, un retén dos bombeiros regresou este venres para realizar labores de ventilación. Un técnico municipal e outro da Policía Nacional inspeccionaron tamén as instalacións para comprobar o estado no que quedaron as infraestruturas e as instalacións eléctricas, que resultaron moi danadas.
Á espera de tomar unha decisión a semana que próxima, quedaron precintadas da planta -1 á -4 ao ser as máis afectadas e onde se sitúan os garaxes e a galería de tiro, lugar no que se orixinou o lume. Tamén se acordou limpar os pisos superiores, destinadas á atención ao público, para proceder á súa reapertura canto antes, aínda que non hai unha data para iso.
