Publicador de contidos

Publicador de contidos

Os EUA poñen en alerta 8.500 soldados e a OTAN envía medios militares ao leste de Europa

Os EUA poñen en alerta 8.500 soldados e a OTAN envía medios militares ao leste de Europa

Borrell cre que non hai sensación de ataque inminente a Ucraína

España non pensa en evacuar persoal da súa embaixada en Ucraína

G24.gal 24/01/2022 18:51

A OTAN mobilizou nos últimos días militares para reforzar a súa presenza no leste de Europa, en resposta á ameaza rusa sobre a seguridade de Ucraína. Así o comunicou a propia organización militar nun comunicado.

"Dou a benvida á contribución adicional das forzas da OTAN. A OTAN continuará tomando as medidas necesarias para protexer e defender todos os aliados, incluíndo o reforzo do flanco oriental da Alianza", asegurou Jens Stoltenberg, secretario xeral da OTAN.

Ademais, tamén asegurou que a organización militar "sempre responderá" a calquera deterioración da "contorna de seguridade" e non renunciará a aumentar a súa defensa colectiva.

Os EUA poñen en alerta 8.500 soldados

Os Estados Unidos puxeron en alerta "elevada" 8.500 soldados ante o aumento da tensión con Rusia por Ucraína, aínda que non adoptou ningunha decisión sobre a súa despregadura no leste de Europa, informou este luns o Pentágono.

O portavoz do Departamento de Defensa dos EUA John Kirby explicou nunha conferencia de prensa que con esta medida esas unidades militares, a maioría terrestres, estarán en menos tempo listas no caso de que Rusia decida avanzar cara a Ucraína.

"Non as estamos despregando agora, non estamos a dicir que a diplomacia morreu", incidiu  Kirby, quen agregou que ao estar en "alerta elevada" se acurta o tempo de preparación para despregarse de dez a cinco días.

O portavoz fixo fincapé en que o groso das tropas estadounidenses se despregaría en países do leste de Europa dentro da Forza de Resposta da OTAN e unicamente se activarían se a alianza atlántica o solicita.

Kirby explicou que depende da OTAN activar esa forza multinacional, que consta de efectivos terrestres, aéreos e marítimos e conta cuns 40.000 militares de distintos países.

Con todo, o portavoz do  Pentágono non descartou unha posible despregadura dos EUA "unilateral" fóra da  NRF, aínda que insistiu en que nese caso sempre sería en coordinación e tras consultas cos aliados.

Preguntado sobre os lugares en que se produciría a despregadura estadounidense,  Kirby non ofreceu detalles e limitouse a dicir que sería en nacións aliadas do flanco leste da OTAN. E detallou que o continxente estadounidense estaría integrado por brigadas de combate que contarían co apoio de equipos loxísticos, médicos e da aviación, entre outros.

Borrell cre que non hai sensación de ataque inminente a Ucraína

O alto representante da Unión Europea para Asuntos Exteriores Josep Borrell afirmou este luns que non hai sentimento de “ataque inminente” a Ucraína tras escoitar a participación do secretario de Estado dos EUA Antony Blinken na reunión do Consello de ministros de Exteriores comunitarios.

“Non, non creo que haxa nada novo que poida incrementar o sentimento de medo sobre un ataque inminente”, dixo Borrell nunha conferencia de prensa ao rematar o encontro.

Agregou ademais que hai “acordo completo” entre os Vinte e sete sobre que non é necesario tomar “medidas preventivas” nesta situación. 

España non pensa en evacuar persoal da súa embaixada en Ucraína

España non pensa en evacuar o persoal da súa Embaixada en Ucraína nin o resto de españois que viven no país, asegurou hoxe o ministro de Asuntos Exteriores José Manuel Albares, que fixo un chamamento á "tranquilidade".

"Aproveito esta ocasión para facer un chamamento a eses españois que están nestes momentos en Ucraína e aos seus familiares á tranquilidade. Non temos pensado evacuar nestes momentos a nosa colonia, tampouco evacuar a Embaixada", dixo Albares na conferencia de prensa posterior á reunión que os ministros de Exteriores da UE celebraron hoxe en Bruxelas.

A colonia española en Ucraína consta de aproximadamente 500 persoas, segundo sinalou Albares, que asegurou que o ministerio de Exteriores está a facer un "seguimento constante" da situación de seguridade no país a través dos servizos consulares e da propia Embaixada.

"Estamos en contacto permanente con eles", asegurou Albares, que lembrou que o pasado día 21 o seu ministerio recomendou non viaxar a Ucraína “salvo por motivos esenciais” debido á “volatilidade” da situación con Rusia.

Albares restou importancia ao feito de que España e a gran maioría de países da UE non decidisen empezar a evacuar o persoal das súas embaixadas en Ucraína, a diferenza do Reino Unido e os Estados Unidos, con cuxo secretario de Estado Antony Blinken se reuniron hoxe por videoconferencia os xefes europeos da diplomacia.
 

Publicidade
Publicidade
Publicidade