O plan de paz deseñado polos EUA e Rusia prevé a retirada de Kíiv do Donbás

O plan de paz deseñado polos EUA con Rusia pide a Kíiv que limite o seu exército a un máximo de 600.000 homes despois da guerra, descarta a entrada de Ucraína na OTAN e que o país invadido se retire do territorio que aínda controla na súa rexión oriental do Donbás, que quedaría tras a guerra como zona desmilitarizada e sería recoñecida de facto internacionalmente como rusa.

As outras dúas rexións en disputa, Khersón e Zaporizhzhia, quedarían baixo control de cada un dos bandos, segundo a partición que marque a liña da fronte no momento do cesamento das hostilidades, segundo o documento, que foi publicado por varios medios ucraínos e polo Instituto para o Estudo da Guerra de Washington, un think tank especializado en conflitos.

O exército ucraíno ten actualmente preto de 900.000 efectivos e Kíiv insistiu en que necesita manter tras a guerra unhas Forzas Armadas o suficientemente numerosas e ben armadas para disuadir a Rusia de volver invadir o seu territorio.

A rexión do Donbás, no leste de Ucraína, comprende as dúas unidades administrativas de Lugansk e Donetsk. Rusia controla practicamente toda Lugansk e ao redor dun 75 % da de Donetsk, onde as forzas do Kremlin gañan terreo de forma lenta pero constante desde hai máis de dous anos.

A central nuclear ocupada de Zaporizhzhia, a máis grande de Europa e baixo control ruso desde o comezo da invasión, distribuiría a electricidade a partes iguais á beira ucraína e á beira rusa.

O plan de paz, ao detalle

Se se acaba asinando este plan de paz, que foi negociado en segredo e ás costas de Ucraína e a UE nas últimas semanas pola Casa Branca e o Kremlin, o presidente Volodimir Zelenski deberá someterse a eleccións nun prazo de cen días desde a entrada en vigor do documento.

Zelenski concluíu o seu mandato en maio de 2024, pero a lei ucraína prohibe votar mentres o país estea en guerra e segue no cargo de forma indefinida ata que poidan volver celebrarse comicios.

O documento, que Kíiv dixo que está disposto a negociar tras recibilo onte de representantes do Pentágono, dispón ademais que Ucraína debe garantir a liberdade relixiosa e recoñecer o dereito para usar o ruso no sistema educativo e os medios, algo que está agora prohibido de facto.

Outro epígrafe do plan prevé a prohibición en Ucraína de toda a ideoloxía e as actividades nazis. O Kremlin utilizou como argumento para a súa invasión a suposta ideoloxía nazi que penetraría no Exército e o Goberno ucraínos despois do derrocamento en 2014 do último presidente prorruso de Ucraína.

Na súa forma actual, o plan garante ademais amnistía para todos os actores implicados na guerra e prevé destinar parte dos activos conxelados a Rusia en Occidente a un proceso de reconstrución de Ucraína que liderarían os EUA.

Rusia sería reintegrada plenamente no sistema internacional de comercio e Ucraína renunciaría á despregadura de tropas da OTAN no seu territorio, unha medida que constitúe a ollos de Kíiv a única alternativa de seguridade viable á súa entrada xa case descartada á Alianza.