Polonia responsabiliza a Rusia da sabotaxe en vía ferroviaria clave para axuda a Ucraína

O primeiro ministro polaco, Donald Tusk, acusou este martes a Rusia de estar detrás da recente sabotaxe nunha liña ferroviaria clave para o envío de axuda a Ucraína.

O xefe do Goberno polaco sinalou nunha intervención ante o Parlamento a "dous cidadáns de Ucraína que operan e colaboran desde hai tempo cos servizos rusos" como autores materiais do ataque sufrido por esa infraestrutura ferroviarias.

O primeiro ministro destacou que os servizos de seguridade polacos "conseguiron establecer as identidades dos responsables" da explosión dun artefacto na vía que une a capital con Lublin e do intento de sabotear outro roteiro, pero especificou que os nomes dos culpables "non poden ser revelados aínda, debido a que hai operacións en curso".

Tusk explicou que unha das persoas sospeitosas é un cidadán ucraíno que xa foi condenado "por actos de sabotaxe por un tribunal en Leópolis en maio deste ano".

O segundo é un "residente do Donbás", rexión oriental de Ucraína, e explicou que ambos entraron en Polonia desde Bielorrusia no outono deste ano e, tras cometer as sabotaxes, fuxiron a través do paso fronteirizo de Terespol.

Ademais, o xefe do Goberno polaco afirmou que "en todos os casos relacionados con sabotaxes e actos de espionaxe (en Polonia) detectouse unha conexión cos servizos rusos".

"Estes feitos son quizais a situación máis grave desde o punto de vista da seguridade do Estado polaco desde o estalido da guerra a gran escala en Ucraína", afirmou o líder polaco.