A Cámara Baixa dos EUA avala obrigar a publicar os documentos sobre Jeffrey Epstein

A Cámara de Representantes dos Estados Unidos aprobou este martes, case por unanimidade, a lei que obriga o Departamento de Xustiza a publicar os documentos do pederasta multimillonario Jeffrey Epstein.

O texto pasa agora ao Senado, que deberá validalo antes de que o presidente, Donald Trump, o asine.

A iniciativa superou a votación con 427 votos a favor e un en contra. A sesión convocouse despois de que 218 lexisladores de ambos partidos impulsasen unha petición formal para presionar a dirección da Cámara.

A proposta obriga o Departamento de Xustiza a facer públicos todos os rexistros, documentos, comunicacións e materiais de investigación non clasificados relacionados coas investigacións e o proceso xudicial de Epstein.

O texto inclúe materiais vinculados con Ghislaine Maxwell, rexistros de voos e viaxes, así como nomes de persoas mencionadas nas investigacións, incluíndo cargos públicos.

O presidente da Cámara, o republicano Mike Johnson, advertiu de que a proposta é mellorable e agarda que o Senado introduza emendas. Sinalou que non foi modificada previamente porque os autores da iniciativa non o permitiron.

O único voto en contra foi o do republicano Clay Higgins, de Luisiana.

A unidade republicana chegou tras un cambio de postura de Donald Trump, que inicialmente se opuxera á medida pero que agora se mostrou disposto a asinala.

Nos últimos meses transcenderon documentos relacionados con Epstein que incrementaron a presión sobre o presidente, que mantivo unha relación de amizade co empresario desde finais dos anos 80 até comezos dos 2000.