Un ataque ruso sobre Ucraína con drons e mísiles deixa 19 civís mortos
A ofensiva alcanzou un edificio de vivendas na cidade de Ternópil
Residentes do edificio de vivendas de Ternópil alcanzado por un mísil ruso (Reuters/Andriy Bodak)
Rusia atacou esta madrugada Ucraína con 476 drons e 48 mísiles de distintos tipos que causaron danos en instalacións enerxéticas e outras infraestruturas civís nunha decena de rexións e mataron 19 civís na rexión de Ternópil do oeste de Ucraína, segundo informaron o presidente Volodimir Zelenski, a Forza Aérea ucraína e o Ministerio do Interior.
Segundo a Forza Aérea, os seus defensas interceptaron 442 drons e 41 dos mísiles lanzados por Rusia no bombardeo.
O presidente ucraíno explicou que o ataque ruso alcanzou en Ternópil un edificio de vivendas no que ademais de morrer dez persoas resultaron feridos decenas de civís.
Zelenski fixo tamén referencia ás consecuencias do bombardeo para a cidade de Khárkiv en Ucraína nororiental, onde sufriron danos infraestruturas enerxéticas e de transporte.
Tamén foron alcanzadas infraestruturas enerxéticas nas rexións de Ivano-Frankivsk, onde resultaron feridas tres persoas, e Leópolis. Ambas están situadas no oeste de Ucraína.
Zelenski afirmou que este novo ataque ruso demostra que "a presión sobre Rusia non é suficiente", e pediu máis sancións ao Kremlin e axuda adicional a Ucraína para protexerse dos bombardeos inimigos.
