António Costa convoca doce líderes do G20 para falar do futuro de Ucraína
España é un dos países convidados a esta xuntanza nas marxes do cume do G20 que se desenvolve en Johannesburgo
Enriba da mesa está o ultimato de Trump a Zelenski para que responda nunha semana sobre o plan de paz da Casa Branca
António Costa e Ursula von der Leyen en Johannesburgo. REUTERS/Yves Herman
O presidente do Consello Europeo, António Costa, convocou este sábado doce líderes dos países do G20 (grupo de países desenvolvidos e emerxentes) a unha reunión para debater o futuro de Ucraína, segundo informan fontes oficiais.
"Como saben, están a levarse a cabo intensos esforzos diplomáticos arredor do plan de paz para Ucraína, á marxe da reunión do G20," sinalou a fonte tras coñecérense os detalles da proposta da Casa Branca para poñer fin á guerra.
Os países convidados son España, Francia, Alemaña, o Reino Unido, Italia, Noruega, o Canadá, o Xapón, Australia, Finlandia, Irlanda e os Países Baixos.
A reunión prodúcese nas marxes do cume do G20 en Johannesburgo, onde están a abordar os retos globais do comercio, a débeda, o desenvolvemento, a xeopolítica ou a transición enerxética.
Plan de paz de Trump
O presidente dos Estados Unidos, Donald Trump, deulle este venres a Ucraína un prazo de menos dunha semana para responder se acepta o plan de paz da Casa Branca que o líder do Kremlin, Vladímir Putin, ve con bos ollos.
O plan de 28 puntos, filtrado a medios estadounidenses, inclúe liñas vermellas para Kíiv, como a redución do seu Exército a un máximo de 600.000 efectivos ou a cesión a Rusia de territorios que non foron conquistado militarmente por Moscova.
Compromiso con Zelenski
Costa e a presidenta da Comisión Europea, Ursula von der Leyen, reiteráronlle este mesmo venres ao presidente ucraíno, Volodímir Zelenski, que calquera plan de paz para este país debe implicar a Kíiv.
Ambos os dous líderes europeos mantiveron unha xuntanza coa primeira ministra italiana, Giorgia Meloni, e co presidente francés, Emmanuel Macron.
Costa tamén reunirá para falar sobre Ucraína os xefes de Estado e de Goberno da Unión Europea (UE) que se despracen a Angola para o cume entre a UE e a Unión Africana os vindeiros 24 e 25 de novembro.
