Trump esixe que o plan de paz sexa aceptado antes do día 27; Zelenski di que "é un dos momentos máis difíciles da nosa historia"

O presidente de Estados Unidos, Donald Trump, deu este venres un ultimato ao mandatario ucraíno, Volodímir Zelenski, para que acepte antes do próximo xoves 27 de novembro, Día de Acción de Grazas, o plan de paz proposto pola Casa Branca para poñer fin á guerra de Ucraína.

"Se as cousas funcionan ben, pódense prorrogar os prazos. Pero o xoves é o día que consideramos oportuno", declarou o mandatario nunha entrevista coa emisora Fox Radio.

Trump fixo estas declaracións despois de que o diario The Washington Post publícase, citando fontes familiarizadas, que a Casa Branca puxo como ultimato a Zelenski o próximo Día de Acción de Grazas para que acepte o plan ou, pola contra, perderá o apoio dos Estados Unidos.

Preguntado pola entrevista sobre o plan, que implicaría que Ucraína cedese territorio a Rusia, o líder estadounidense subliñou que Kíiv xa "está a perder territorio" coa guerra, un conflito que dixo está "fóra de control, é un masacre".

O mandatario lembrou que ata o de agora Estados Unidos transferiu a Ucraína "os mellores equipamentos militares do mundo".

Cuestionado sobre a posibilidade de que o presidente ruso, Vladímir Putin, decida atacar no futuro a outros países europeos, Trump mostrouse convencido de que o xefe do Kremlin "non busca máis problemas" e que aprendeu a lección dunha guerra "que debería durar un día e leva catro anos".

Destacou ademais a entrada en vigor este venres das novas sancións estadounidenses contra as dúas maiores petroleiras rusas, Rosneft e Lukoil, que cualificou de "moi poderosas".

Zelenski fala con teléfono con Vance para atopar un camiño “xusto” cara á paz

O presidente ucraíno, Volodímir Zelenski, falou este venres por teléfono co vicepresidente dos Estados Unidos, JD Vance, para atopar un camiño “xusto” cara á paz, segundo dixo o líder ucraíno nas súas redes sociais.

“Conseguimos cubrir moitos detalles das propostas da parte estadounidense para terminar a guerra e estamos a traballar para facer que o camiño cara a adiante sexa digno e realmente efectivo para lograr unha paz duradeira", escribiu Zelenski.

O presidente ucraíno explicou ademais que acordou con Vance traballar xuntos con Europa “ao nivel de asesores de seguridade” para avanzar cara a ese obxectivo.

“Ucraína sempre respectou e continúa respectando o desexo do presidente dos EUA, Donald Trump, de poñer fin ao baño de sangue e vemos de forma positiva toda proposta realista. Acordamos manter contacto constante”, concluíu Zelenski, que dixo que a conversación durou case unha hora.

Zelenski, afirmou este venres nun discurso á nación que o país pode enfrontarse a ter que elixir entre perder a súa dignidade ou renunciar a unha aliado clave, despois de que transcendese que os EUA propuxéronlle un plan de 28 puntos para poñer fin á guerra que cruza varias das liñas vermellas de Ucraína.

"Este é un dos momentos máis difíciles da nosa historia. É un dos momentos de máis presión sobre Ucraína. Agora Ucraína pode atoparse ante eleccións moi difíciles. Ou perder a dignidade ou arriscarse a perder a unha aliado clave. Ou 28 puntos difíciles ou un inverno extremadamente complicado", dixo Zelenski.

Un plan de 28 puntos

O plan de 28 puntos de Trump para Ucraína, filtrado a medios estadounidenses, inclúe liñas vermellas para Kíiv, como a redución do seu exército a un máximo de 600.000 efectivos ou a cesión a Rusia de territorios que non foron conquistados militarmente por Moscova.

Aínda que segundo as filtracións o plan foi negociado entre Estados Unidos e Rusia, a Casa Branca sostén que conversou "por igual" con Ucraína.

O novo empuxe para un novo plan de paz chega tras meses nos que Trump mostrara a súa frustración pola negativa de Putin a deter a guerra en Ucraína e a imposición a Moscova de varios ultimátums que foron incumpridos.

Zelenski acordou cos seus principais socios europeos coordinar posicións para negociar cos Estados Unidos o documento presentado por Washington como punto de partida.

O mandatario ucraíno advertiu este venres de que o país se enfronta a "eleccións moi difíciles" que poderían entrañar o risco de perder a unha aliado clave como é Washington.