A ministra Isabel Rodríguez reivindica o Nunca máis na homenaxe á marea branca

Coa asistencia da ministra de Política Territorial, Camariñas homenaxeou este domingo 13 de novembro de 2022 os miles de voluntarios que hai vinte anos se achegaron á Costa da Morte para participar nas tarefas de limpeza do chapapote vertido tras o naufraxio do Prestige. Un mural instalado na lonxa vella, unha placa conmemorativa e unha exposición fotográfica na casa da Pedra lembran a marea branca que lle fixo fronte á marea negra, na que foi a maior catástrofe ambiental da historia de España.

 "E vemos tres autobuses, e empezou a saír xente vestida de branco, con luvas, ben equipados, empezaron a facer unha ringleira. Deus, eu iso non o vou esquecer en toda a miña vida", lembra esta veciña.

A ministra estivo acompañada pola alcaldesa e o presidente da Deputación da Coruña. Na súa intervención, Isabel Rodríguez reivindicou a cultura do Nunca Máis. Dixo que a marea branca foi a primeira gran mobilización por motivos ambientais do país e que vinte anos despois estamos mellor, con máis conciencia social e máis medios para loitar contra un accidente deste tipo.

"Cun Goberno que leva a política ecolóxica como unha política de Estado, que lle fai fronte ao cambio climático que propón unha nova política enerxética alternativa a estes combustibles" "Para que iso non volva suceder, lembranza, nunca máis".