A lei da AP-9 volve tropezar coas xerais: o acordo para negociar publícase o día do anuncio electoral

A lei de traspaso da AP-9 a Galicia volve tropezar coas eleccións xerais. Aínda que nesta ocasión a norma non decaerá coa disolución das Cortes (o texto pactado por PSOE, BNG e Sumar xa está en vigor), a negociación ao redor do seu contido (que rexeita a Xunta) podería verse afectada polo devir electoral.

O Boletín Oficial do Estado (BOE) e o Diario Oficial de Galicia (DOG) publican este luns, coincidindo coa data en que o presidente do Goberno, Pedro Sánchez, anunciou os comicios do 29 de novembro, o acordo da comisión bilateral de Xunta e Goberno para iniciar negociacións e tratar de superar as discrepancias que o Executivo autonómico ten coa norma.

Como é habitual, o acordo inclúe a designación dun grupo de traballo para negociar e tamén que se lle comunica a conxuntura ao Tribunal Constitucional (TC), que sería a vía que lle quedaría ao Goberno de Alfonso Rueda se non alcanza un consenso arredor dunha normativa que rexeitou desde o primeiro minuto.

O propio Rueda incidiu en que a formulación da norma non garante "o financiamento" da transferencia da Autoestrada do Atlántico, unha vía estratéxica na comunidade, e insistiu en que o PPdeG e o seu Executivo non están dispostos a aceptar "un negocio ruinoso" que podería ter un impacto de "miles de millóns".

Nesta conxuntura, xustificou o paso de convocar unha bilateral para negociar sobre o texto da lei (que non sobre o traspaso e as condicións do mesmo, ao que dirixía o texto). A carta do recurso de inconstitucionalidade seguiría presente.

Primeiras xerais co texto aprobado

En todo caso, esta convocatoria das xerais chega cun elemento diferencial: non decaerá un texto en tramitación no Congreso, como si sucedera en 2023.

O traspaso da AP-9 leva anos reclamándose desde Galicia. O Parlamento galego aprobou un primeiro texto por unanimidade en marzo de 2016, pero tivo que presentar outros dous ante o veto do entón Goberno de Mariano Rajoy. O terceiro foi aprobado por unanimidade na Cámara autonómica en maio do ano 2018.

Tamén este decaeu e non foi ata febreiro de 2021 cando representantes dos grupos galegos volveron defender a toma en consideración (o texto mantívose idéntico). Logrou a maioría de apoios, salvo o dos deputados de Vox, e empezou o seu periplo no Congreso que freou a convocatoria de 2023.

De novo outro texto saíu con unanimidade da Cámara autonómica e iniciou a súa tramitación na lexislatura estatal que agora acaba. Pero a unanimidade pronto quedou de lado.

Se inicialmente PP e BNG afearon a Pedro Sánchez e aos seus as sucesivas prórrogas que freaban o avance do texto na Cámara baixa, e o PSOE incluso presentou emendas que alteraban substancialmente, a tramitación axilizouse tras un pacto alcanzado por socialistas, BNG e Sumar, que o PP rexeitou.

Este texto foi aprobado e entrou en vigor o pasado 1 de agosto, pero a Xunta xa anticipara que non estaba de acordo co seu contido. É o que agora, segundo os diarios oficiais de Galicia e o Estado, se negociará co Goberno. Pero, unha vez máis, unha convocatoria electoral crúzase polo medio.