O Goberno prevé volver aprobar este martes os decretos sobre vivenda

O Goberno prevé volver aprobar na reunión do Consello de Ministros deste martes os decretos leis sobre vivenda que rexeitou a pasada semana o pleno do Congreso.

Despois de que o xefe do Executivo, Pedro Sánchez, anunciara eleccións anticipadas para o 29 de novembro, fontes do Goberno sinalaron que a intención é volver aprobar eses decretos que non conseguiron o aval parlamentario ao sumarse Junts ao rexeitamento de PP e Vox.

Se se aproban eses decretos, terán que ser validados no prazo dun mes polo Parlamento, e ao estar xa disolto, quen ten potestade para facelo é a Deputación Permanente.

Este órgano cumpre un papel de substituto do pleno do Congreso para que determinadas e especiais funcións non queden desatendidas cando a cámara fose disolta ou expirase o seu mandato, como ocorre coa validación dos decretos-leis ditados polo Goberno.

A diferenza do sucedido no pleno do Congreso, o Goberno tería na Deputación Permanente maioría suficiente para aprobar polo menos un dos dous decretos que decaeron a semana pasada, porque o voto de Junts xa non sería necesario.

Son 68 deputados, máis a presidenta do Congreso, Francina Armengol, os que forman parte da Deputación Permanente coa seguinte repartición: 27 do PP, 24 do PSOE (coa suma de Armengol son 25), 6 de Vox, outros 6 de Sumar, e 1 de ERC, PNV, Junts, Bildu e Mixto (que corresponde a Podemos).

Con esa repartición, se se mantivese o sentido de voto dos grupos, podería saír adiante o decreto que contiña o groso das medidas en materia de vivenda.

Os votos das formacións que o apoiaron entón (todas excepto PP, Vox e Junts) suman 35, por 34 dos que expresaron o seu rexeitamento.

Se se repetise o texto do segundo decreto, o relativo á renovación automática de alugueiros, este non sairía adiante porque o PNV votou en contra do mesmo.